Rafal ehf. og eigendur Bergraf ehf. hafa náð samkomulagi um kaup Rafal á öllu hlutafé Bergrafs, með fyrirvara um endanlegan frágang viðskiptanna. Markmið kaupanna er að styrkja enn frekar þjónustu og þekkingu á sviði gatnalýsingar, rafmagns og tengdra innviða.

Kaupin eru háð hefðbundnum fyrirvörum, þar á meðal samþykki Samkeppniseftirlitsins og fullnægjandi niðurstöðu áreiðanleikakönnunar.

Bæði Rafal og Bergraf hafa byggt upp sterka stöðu og mikla reynslu á sviði gatnalýsingar. Með kaupunum sameinast þekking, mannauður og þjónusta félaganna undir merkjum Rafal. Starfsemi Bergraf mun renna inn í Rafal og þannig skapast öflugri heild með aukna getu til að þjónusta viðskiptavini og takast á við fjölbreytt og umfangsmikil verkefni.

Bergraf mun halda áfram rekstri sínum með óbreyttum hætti á meðan áreiðanleikakönnun stendur yfir. Gert er ráð fyrir að viðskiptin gangi formlega í gegn þegar öll skilyrði hafa verið uppfyllt.

„Við eigendur og starfsmenn Bergraf erum mjög spennt að takast á við ný og krefjandi verkefni með starfsfólki Rafal.  Ég er afar sáttur með kaup Rafal á Bergraf og veit að innkoma okkar mun gera gatanlýsingateymið að því besta á landinu”  segir Mundi framkvæmdastjóri Bergraf.